Manifestum sit omnibus quod nos Iacobus, Dei gracia rex Aragonum, comes Barchinone et dominus Montispesulani, attendentes quod cum ex debito regie honestatis et divine retribucionis intuitu, nos iura et loca religiosa et ecclesiastica, tanquam nostra specialia, teneamur deffendere et servare, maxime loca que a nostris predecessoribus fundata fuerint et constructa, cum presenti scriptura constituimus et recipimus domum sive hospitale de Boxerols, quod dominus Ildefonsus rex, recordacionis inclite avus noster, edificavit et construxit in regno nostro.

Et vos Iohannem, priorem, ac fratres et conversos et omnes donatos et donatas eiusdem hospitalis, presentes scilicet et futuros, et omnes domos et res vestras, mobiles et immobiles et se moventes, habitas et habendas, sub securo ducatu nostro et firma protectione nostra ac custodia speciali, dantes vobis et concedentes auctoritatem nostram et licentiam ac plenam potestatem predictum hospitalem cum domibus suis suffraganeis et vosmedipsos cum omnibus bonis vestris et domus vestre, habitis et habendis, dandi et offerendi et applicandi domui et ordini Hospitalis Sexene in perpetuum, ubi habitum religionis eiusdem assumatis et assumere valeatis, sub iurisdiccione et obediencia priorisse domus predicte, secundum ordinis illius consuetudinem existentes, tanquam participes in temporalibus et spiritualibus, sicut et alii fratres et sorores eiusdem ordinis effecti.

Statuimus itaque firmiter et mandamus universis militibus, baiulis, vicariis, merinis, zavalmedinis, iusticiis, iuratis, alcaldis, scutariis et aliis nostris hominibus, substitutis et substituendis, quod domum de Boxerols et fratres ac sorores et conversos ac conversas eiusdem, et omnia eorum bona, tanquam nostra specialia, ad comodum et salvamentum domus Sexene, cuius predicta omnia sunt, et concedimus etiam et confirmamus esse propria monasterii de Sexena, manuteneant, custodiant et deffendant, nec permittant ab aliquo indebite molestari.

Quicumque autem huic nostro ducatui et confirmationi nostre presumpserit contrahire, iram et indignacionem nostram se prorsus noverit incursurum, et dampno ac gravamine ab eo domui Sexene et eius hospitali de Boxerols predicto prius plenarie restitutis, in mille aureis a nobis sine remedio aliquo punietur.

Datum Pertuse, kalendis marcii era Mª CCª LXª quinta.

Signum + Iacobi, Dei gracia regis Aragonum, comitis Barchinone et domini Montispesulani.

Huius rei testes sunt: Rodericus de Lizana. Ato de Focibus, maiordomus Aragonie. Vallesius de Bergua. Dompnus Latronus. Lupus Ferrenqui de Luna. Sancius de Orta. P[etrus] Pomar. P[etrus] Petri, iusticia Aragonum.

Ego Arnaldus Gramaticus, scriptor domini regis, mandato ipsius pro G. Rabacia, notario suo, hoc scribi feci et meum sig+num apposui loco, die et era prefixis.