In Christi nomine.

Sit notum cunctis quod nos Iacobus, Dei gracia rex Aragonum, comes Barchinone et dominus Montispesulani, essemus plurimum dispaccati de iuratis et civibus conciliis Cesarauguste, Osce et Iacce, propter quasdam collegaciones, confederaciones, empresiones, homagia, iuramenta que inter se fecerunt et cum quibusdam nobilibus et militibus terre nostre quam dicebamus esse facta in nostre preiudicium dignitatis. Tandem ipsi iurati, cives et concilia supradicta, habentes spiritum consilii sanioris, promiserunt in manibus venerabilium patrum S. archiepiscopi terrachonensis patrui nostri, B. episcopi ilerdensi ac fratris F. de Montepesato magistri domus militie Templi, sub homagiis et sacramentis super quatuor evangelia corporaliter tactis, quod quidquid nos consilio ipsorum trium super predicta dissensione et discordia mandaremus, susciperent et ratum perpetuo observarent.

Nos igitur, habito dictorum trium consilio et assensu et ipsis presentibus ac multis aliis nobilibus Catalonie et Aragonie et etiam fidelibus nostris uratis et probis hominibus Cesarauguste, Raimundo Gasco, Bartholomeo Iter, Bruno de Tarba, Aznario Vacher, Bartholomeo Tarin, Iohanne Iter, Enego Sanz, Martino Frenario, Matheo de Avinione, Petro Enamorad, Estefano de Alfagaria, per se et alios iuratos et totum concilium Cesarauguste in nostra presencia constitutis; item, iuratis et probis hominibus Osce, Ugone Martino, Petro Bonanato, Raimundo Gauzelm, Galardo de Briva, Dominico Ferrario, Berengario Marchisio, Petro Sora, Petro Massel, per se et alios iuratos et totum concilium Osce in nostra presencia constitutis; item iuratis de Iacca, Iohanne de Mombaldran, Adam Borser, per se et alios iuratos et totum concilium Iacce in nostra presencia constitutis, sentencialiter pronunciantes reprobamus, cassamus et penitus irritamus omnes colligaciones, confederaciones, empresiones et homagia et sacramenta inter dictos cives, inter se et inter milites vel cum militibus facta, usque in presentem; et decernimus vires aliquas de cetero non habere.

Mandantes et precipientes vobis iuratis et civibus supradictis et per vos vestris conciliis memoratis, quod reddatis nobis instrumenta omnia que super sunt confecta.

Item mandamus vobis predictis et per vos vestris conciliis memoratis quod de cetero aliquas colligaciones, confederaciones, empresiones, iuramenta et homagia vel hiis similia nullatenus faciatis sine nostri mandato vel licencia speciali.

Item, mandantes precipimus vobis et per vos vestris conciliis memoratis ut nobis homagia et iuramenta fidelitatis corporaliter faciatis.

Item mandamus vobis predictis et per vos vestris conciliis memoratis quod remitatis et condonetis nobis et valitoribus nostris omnia dampna et iniurias vobis et ipsis conciliis per nos vel per valitores nostros illata, et hereditates valitorum nostrorum que per vos et concilia vestra supradicta fuerant occupate, reddantur dominis propriis et penitus absolvantur; et reddatis captos nostros omnes quos tenetis sine redemptione.

Nos, igitur, iurati prenominati, per nos et per nostra concilia, mandata predicta suscipimus humiliter et devote; et solvimus colligaciones, confederaciones, empresiones, iuramenta et homagia supradicta; et tradimus vobis et reddimus omnia instrumenta que fecimus de premissis; et servabimus et complebimus omnia predicta et singula que vos, dompne rex, nobis et conciliis mandavistis bona fide toto posse nostro; et in presenti facimus vobis corporaliter homagia et iuramenta fidelitatis sacrosanctis quatuor evangeliis tactis; et hoc idem iuramentum facient vobis ad nostrum posse ipsa tria concilia memorata.

Et nos Iacobus, Dei gracia rex predictus, per nos et omnes valitores nostros, bono corde, remittimus vobis predictis iuratis et per vos vestris conciliis memoratis et hominibus villarum nostrarum qui fuerunt vobiscum in coniurationibus et confederationibus supradictis universis et singulis, omnes iniurias et dampna illata nobis et regno et valitoribus nostris data, et solvimus vobis sine redemptione omnes captos vestros quos tenemus nos vel valitores nostri.

Item remitimus vobis et per vos vestris conciliis memoratis omnes indignationem et rancorem que contra vos vel ipsos vel aliquem vestrum vel ipsorum concepimus, occasione predictarum coniurationum vel qualibet alia ratione; et perpetuo condonamus et omnem questionem quam contra vos et ipsos movere potuimus ullo modo, penitus extinguimus et delemus; et diligemus vos vero corde et benigne tratabimus sicut fideles nostros homines et legales.

Promitimus, etiam, vobis, venerabilibus patribus archiepiscopo et episcopo et magistro milicie Templi supradictis, quod de tribus conciliis memoratis captinebimus nos bene.

Preter hec omnia damus et confirmamus vobis prenominatis et tribus conciliis vestris predictis, omnes fueros et bonas consuetudines et libertates actenus obtentas, sicut eas melius habuistis et tenuistis bona fide. Et hoc iuramus tactis sacrosanctis quatuor evangeliis et liberaliter confirmamus.

Et de hoc facimus vobis alia singularia instrumenta.

Si autem aliquid verbum ambiguum vel obscurum est suprapositum vel aliquid est supplendum arbitrio venerabilium trium patrum vel duorum ex tribus ubi tercius adesse nequeverit declarandum relinquimus et supplendum.

Datum apud Alcalanum, kalendas aprilis era Mª CCª LXª quinta, cum litteris rasis et rescriptis in septima decima linea ubi dicitur «omnem indignationem».

Signum + Iacobi, Dei gracia regis Aragonum, comitis Barchinone et domini Montispesulani.

Huius rei testes sunt: Sparagus, archiepiscopus terrachonensis. Berengarius, episcopus ilerdensis. Frater F., magister Templi. R. Fulco, vicecomes Cardone. G. de Cardona. Geraldus Alamandi. Berengarius de Erillo. Rodericus de Lizana. Vallesius de Bergua. Sancius de Orta. P. Pomar.

Ego Arnaldus Gramaticus, scriptor domini regis, mandato ipsius pro Guillelmo Rabacia, notario suo, hoc scribi feci meumque sig+num aposui loco, die et era prefixis.