Manifestum sit omnibus quod nos Iacobus, Dei gracia rex Aragonum, comes Barchinone et dominus Montispesulani, volentes sequi vestigia antecessorum nostrorum qui monasterium de Sexena fundaverunt et illud crebris beneficiis ampliarunt, idcirco, ob remedium anime nostre nostrorumque omnium successorum, cum presenti carta perpetuo valitura donamus Deo et gloriose Virgine Marie ac vobis, dilectis nostris priorisse totique conventui monasterii de Sixena, presentibus et futuris, castrum de Saranyena integre, cum suis pertinenciis universis, ita ut ex mera et libera donacione nostra castrum illud perpetuo habeatis, possideatis et expletetis pacifice et potenter et sine aliqua diminucione vel obstaculo alicuius persone viventis et ibidem construatis ac construi faciatis domos et alia quelibet hedificia seu habitacula pro vestre arbitrio voluntatis.

Quas domos queve hedificia seu habitacula habeatis, possideatis et expletetis iure hereditario sine omni penitus regali servicio et vicinali, et absque omni exaccione seu consuetudine vel facendera nova vel veteri nec non statuta vel statuenda; quorum omnium et singulorum nunquam vos vel aliqui in eisdem morantes nobis ac successoribus nostris aliquid teneamini solvere aliqua racione vel causa.

Statuimus itaque et firmiter precipiendo mandamus maioridomus, repositario, senioribus, merinis et aliis quibuslibet officialibus nostris, substitutis et substituendis, et specialiter iusticie totique concilio de Saranyana, nec non cunctis aliis submissis nostris, presentibus et futuris, quod hanc donacionem a nobis liberaliter et misericorditer factam, observent fideliter et faciant inviolabiliter observari.

Quicumque autem huic donacioni nostre in aliquo presumpserit contrayre, iram et indignacionem nostram et penam mille morabotinorum a nobis se noverit procul dubio incursurum, carta ista nichilominus in suo robore duratura.

Datum Cesarauguste, III nonas novembris era M. CC. LX. quinta.

Signum + Iacobi, Dei gracia regis Aragonum, comitis Barchinone et domini Montispesulani.

Huius rei testes sunt: Rodericus de Liçana. Matalonus de Frescano. Petrus (lac.). Peregrinus de Atrossillo. Egidius de Atrosillo. G. Petri de Medietate. Lupus Eximini de Lusia. Petrus Petri, iusticia Aragonum.

Sig+num Bertrandi de Villanova, qui mandato domini regis pro Gomicio de Almoguerio, notario suo, hoc scripsit loco, die et era prefixis.