Noverint universi quod nos Iacobus, Dei gratia rex Aragonum, Maioricarum et Valentie, comes Barchinone et Urgelli et dominus Montispesulani, recipimus et constituimus in nostra protectione et guidatico speciali omnes et singulos homines et feminas undecumque sint causa peregrinationis venientes ad Sanctam Mariam de Salis de Oscha et inde redeuntes cum omnibus que ducent vel portaverint inveniendo, stando et redeundo.

Ita quod pro aliquibus debitis que pro se ipsis vel ratione fideiussionis vel alio quoquomodo debeant vel pro aliquibus propriis vel alienis delictis vel debitis non pignorentur vel marchentur vel modo aliquo impediantur vel molestentur in aliquo loco terre vel dominationis nostre quousque de ipsa peregrinatione ad domos vel loca propria sint reversi, nisi essent proditores manifesti vel incartati vel comitterent in peregrinatione tale crimen propter quod puniri deberent.

Mandantes senioribus, maioribusdomus, vicariis, baiulis, curiis, paciariis, çavalmedinis, iusticiis, iuratis, iudicibus, alchaldis et aliis nostris subditis universis, presentibus et futuris, quatinus hanc protectionem et guidaticum nostrum firmum habeant et observent et faciant ab omnibus inviolabiliter observari.

Quicumque autem contra hoc guidaticum nostrum venire temptaverit, iram et indignationem nostram et penam mille morabetinorum alfonsinorum se noverit incursurum.

Datum Osce, II idus augusti anno Domini Mº. CCº. quinquagesimo.

Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt: G. de Entença. P. de Montecathano. P. Martini de Luna. Eximinus de Focibus. Sancius de Antillon.

Sig+num Petri Andree, qui mandato domini regis pro G. Scriba, notario suo, hec scribi fecit loco, die et anno prefixis.