Noverint universi quod nos Iacobus, Dei gracia rex Aragonum, Maioricarum et Valencie, comes Barchinone et Urgelli et dominus Montispesulani, per nos et ostros concedimus et ad feudum tradimus vobis, Eximino Petri de Pina et Guillelmo, rectori ecclesie de Pina, fratri vestro, et vestris successoribus, in perpetuum, castrum nostrum de Pina cum valle eidem contigua, sub tali conditione quod in dicta valle vos et vestri non possitis unquam facere vel constituere operatoria sine nostra vel nostrorum licencia speciali, et quod semper vos et vestri donetis nobis et nostris successoribus, iratis et paccatis, potestatem de dicto castro ad consuetudinem Barchinone, quandocumque et quocienscumque dictam potestatem a vobis vel vestris demandaverimus; et quandocumque nos vel nostri venerimus Pinam, hospitemur in ipso castro, si volumus, sicut in castro nostro proprio.

Concedimus eciam vobis quod possitis in dictum castrum redire et inde exire si guerram habueritis contra aliquem vel aliquos, sicut possetis facere in domum vestrum vel de domo vestra quam habetis in Pina.

Nos igitur Eximinus Petri predictus et Guillelmus, frater eius, recipimus a vobis, illustri domino nostro Iacobo, rege Aragonum predicto, dictum castrum et vallem et mercedem quam nobis facitis de eisdem sub condicionibus antedictis, et promittimus et convenimus vobis et vestris successoribus per nos et nostros in perpetuum quod custodiemus vos et res vestras et homines vestros ubicumque sint et specialiter homines vestros de Pina ab omni dampno et gravamine et ab omni forcia, secundum posse nostrum, et quod de dicto castro non exeat vobis nec terre vestre malum aliquod neque guerram, et quod faciemus pro vobis et vestris guerram et pacem de ipso castro coram omnes personas et quod non faciemus guerram de ipso castro nec aliquod malum vel contrarium alicui vel aliquibus sine vestri ac vestrorum licencia et mandato.

Et pro hiis omnibus antedictis complendis et attendendis, obligamus vobis et vestris nos et nostros et predictam concessionem quam nobis facitis et facimus vobis homagium oris et manuum ad consuetudinem Barchinone, ad quod homagium faciendum omnes successores nostri vobis et vestris perpetuo teneantur.

Datum Morelle, XII kalendas aprilis anno Domini M. CC. quinquagesimo.

Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt: P. Hugonis comes Empuriarum. Eximinus Petri de Arenoso. R. de Liçana. G. de Montecluso. Poncius de Verneto.

Sig+num Petri Andree, qui mandato domini regis … hoc scribi fecit loco, die et anno prefixis.