Noverint universi quod nos Iacobus, Dei gracia rex Aragonum, Maioricarum et Valencie, comes Barchinone et Urgelli et dominus Montispesulani, per nos et omnes nostros damus et concedimus ad censum vobis, Sancio de Orradre, abbati, et toti conventui ecclesie Montis Aragonis imperpetuum, castrum et villam nostram de Marcen et villam nostram de Petrosis, quod castrum et ville sunt in regno Aragonie, et quod castrum et villas habueramus a vobis in concambium pro castro et villa de Sancta Eulalia et pro villa de Castel Savals que vobis dedimus.

Ita quod pro predictis castro et villa de Marcen et pro dicta villa de Petrosis detis vos et successores vestri nobis et successoribus nostris inperpetuum, singulis annis in mense ianuarii, mille solidos iaccensis in civitate oscensis; et sic habeatis dictum castrum et villas cum omni fortitudine ipsius castri et cum omni iure et dominio in ipso castro et ville habemus et habere debemus, cum casis etiam et casalibus, vineis, ortis et ortalibus, campis, ademprivis et aliaziris ac terris cultis et incultis, heremis et populatis, montibus, lignis, silvis et venationibus, erbis, pratis et pascuis, escaliis, introitibus et exitibus, terminis et vetatis et suis pertinentiis universis a celo in abissum, et cum omnibus hominibus et feminis ibidem habitantibus et habitaturis cuiuscumque legis vel conditionis sunt vel erunt, et cum peitis, questis, cenis, precariis, donis, serviciis, ademprivis et quibuslibet aliis regalibus exactionibus ac iusticiis et caloniis, civilibus et criminalibus, exercitibus et cavalcatis et eorum redemptionibus, et cum omnibus omnino et singulis aliis iuribus et pertinentiis que ad predictum castrum et villas pertinent vel possint aut debent modo aliquo pertinere et cum omnibus aliis et singulis que nos ibidem vel ab hominibus et feminis ibi habitantibus et habitaturis debemus habere vel percipere quoquomodo sine aliquo nostro nostrorumque retentu ad habendum, tenendum, possidendum, expletandum, dandum, vendendum, impignorandum, alienandum et ad omnes vestras vestrorumque successorum voluntates cui et quibus volueritis libere perpetuo faciendas, salvo tamen nobis et nostris imperpetuum dicto censu.

Et nos, predictus S[ancius] de Orradre, abbas, et totus conventus ecclesie predicte Montis Aragonis recipimus a vobis, illustri domino Iacobo, regi predicto, predictum castrum et villam de Marcen et villam de Petrosis cum omnibus supradictis que nobis detis et conceditis ut superius continetur, sub conditionibus antedictis; et promitimus vobis et vestris dictum censum annuatim solvere, ut dictum est superius.

Et ad ipsum censum solvendum, obligamus vobis et vestris omnes redditus vestros tocius hereditatis nostre quam habemus in Osca et eius terminis et omnes redditus et exitus nostros de Terz et de Quicena, ita quod de dictis redditibus hereditatis nostre de Osca teneamur nos et successores nostri dictos mille solidos iaccensium solvere vobis et vestris successoribus annuatim termino supradicto.

Et si redditus dicte hereditatis de Osca non suffecerint ad solutionem dictorum mille solidorum quicquid inde defecerit teneamur complere vobis et vestris successoribus in eodem termino de redditibus predictis de Terz et de Quicena.

Datum Ilerde, IIIº nonas iunii anno Domini Mº. CCº. Lº. IIº.

Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt: G. de Montecatano. Raimundus Berengarii de Ager. P. de Montecatano. Bernardus Guillelmi de Entença. Egidius de Rada.

Sig+num S[ancii] Dei gracia abbatis ecclesie Montis Aragonis. Sig+num D. de Petra Rubea, prioris claustri, ac totius capituli. Sig+num P. Eximini prepositi. Sig+num P. camerarii Sig+num M[athei] helemosinarii. Sig+num M. cantoris. Sig+num A[de] sacriste. Sig+num M. infirmarii.

Sig+num P[etri] Andree, qui mandato domini regis et abbatis et conventus predictorum hec scripsit loco, die et anno prefixis.