Pateat universis quod nos Iacobus, Dei gracia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros, ob reverentia Domini Nostri Ihesu Christi et salute anime nostre, damus et concedimus plenam licentiam et potestatem quinquaginta hominibus, vicinis et parrochianis ecclesie Sancti Salvatoris iaccensis quod possint emere hereditates et possessiones, sive sint de realenco sive non, valentes anno quolibet in redditibus centum solidos iaccenses, pro instituendo uno capellano perpetuo in ecclesia Sancti Salvatoris predicta qui officia celebret divina ibidem.

Quas hereditates et possessiones dicta ecclesia habeat et possideat libere et quiete in perpetuum per hereditatem propriam, francham et liberam sic quod pro ipsis, sive sint de realenco sive non, in questiis, peytis et quibuslibet aliis serviciis et exaccionibus regalibus nichil dare aut solvere teneatur.

Concedimus etiam hominibus quinquaginta predictis quod bis in anno possint convenire in unum locum et ibidem edere ut confratres.

Mandantes senioribus, baiulis, iusticiis, iuratis et universis aliis officialibus et subditis nostris, presentibus et futuris, quod hanc nostram concessionem firmam habeant et observent et firmiter faciant observari, et contra ipsam non veniant nec aliquem venire permittant aliqua ratione.

Datum Tirasone, II idus septembris anno Domini Mº. CCº. Lº. quinto.

Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt: Bernardus Guillelmi de Entença. G. Romei. Sancius de Antilione. G. de Podio. Eximinus Petri de Arenoso.

Sig+num Michaelis de Alcoario, qui mandato domini regis pro domino fratre Andrea, episcopo Valencie, cancellario suo, hec scripsit loco, die et anno prefixis.