Noverint universi quod nos Iacobus, Dei gracia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros damus et concedimus per hereditatem propriam, francham et liberam vobis, dilecto nostro Martino Petri, iusticie Aragonum, et vestris imperpetuum, castrum et villam d’Estada cum omni fortitudine ipsius castri et ville, cum casis et casalibus, vineis, ortis, campis, ademprivis et aliaziris, areis et padulibus ac terris cultis et incultis, heremis et populatis, furnis, molendinis et columbariis, aquis, erbis, pratis et pascuis, montibus, lignis, silvis et arboribus fructiferis et infructiferis, piscationibus et venationibus, introitibus et exitibus, terminis et suis pertinentiis universis a celo in abissum et cum omnibus hominibus et feminis ibi habitantibus et habitaturis cuiuscumque legis vel conditionis sunt vel fuerint, cum peytis eciam, questiis, donis et serviciis, exercitibus, cavalcatis et eorum redemptionibus, quintis, quartis, novenis et tributis et monetaticis, caloniis et iusticiis civilibus et criminalibus, redditibus, exitibus et proventibus et quibuslibet regalibus exactionibus et iuribus que nos et nostri in predicto castro et villa et suis terminis et ab hominibus et feminis ibi habitantibus et habitaturis habemus vel habere aut percipere debemus de consuetudine vel de iure vel de alio quoquo modo integre et sine ullo nostro nostrorumque retentu, sicut ad utilitatem et salvamentum vestrum et vestrorum melius et firmius potest dici vel intelligi ullo modo.

Et extrahentes predictum castrum et villam cum omnibus et singulis supradictis de iure, dominio et posse nostro et nostrorum, eadem, in ius, dominium et corporalem possessionem vestram et vestrorum, mitimus et transferimus, inducentes vos et vestros in corporalem possessionem omnium et singulorumn predictorum irrevocabiliter cum hoc instrumento perpetuo valituro; ita tamen quod vos et vestri serviatis inde nobis et nostris in perpetuum de uno milite vel de uno scutifero qui sit de genere militum ad modum militis bene preparati ad serviendum nobis sicut richi homines Aragonum nobis servire tenentur, secundum forum Aragonum, pro honoribus quos pro nobis tenent.

Et sic habeatis vos et vestri in perpetuum dictum castrum et villam cum omnibus supradictis ad dandum, vendendum, impignorandum, alienandum et ad omnes vestras vestrorumque voluntates cui et quibus volueritis libere perpetuo faciendas, salvo tamen nobis et nostris in perpetuum servicio supradicto.

Pro hac autem donacione, confitemur et recognoscimus nos recepisse a vobis, domino Martino Petri, iusticia Aragonum, quingentos morabatinos alfonsinos bonos, boni auri et recti ponderis, de quibus omnibus nos concedimus bene esse pacatos nunc et inperpetuum ad nostram propriam voluntatem per nos et omnes nostros.

Renunciantes omni excepcioni non numeratorum et non ponderatorum et non receptorum predictorum morabatinorum et doli.

Et ideo promitimus vobis per nos et nostros quod predictum castrum et villam cum omnibus et singulis supradictis faciemus vos et vestros habere, tenere et possidere integre et in pace contra omnes personas in perpetuum; vobis et vestris facientibus nobis et nostris inde dictum servicium ut superius continetur.

Et ego, predictus Martinus Petri, iusticia Aragonum, cum graciarum accionibus recipio a vobis, illustri domino meo rege predicto, per me et omnes meos, dictum castrum et villam cum omnibus et singulis supradictis, que nobis datis et conceditis sub condicionibus antedictis.

Datum Calataiubi, IX kalendas marcii anno Domini Mº. CCº. Lº. quinto.

Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt: R. vicecomes Cardone. G. Romei. Eximinus de Focibus. Iaufridus vicecomes de Rochabertino. Bernardus G. de Entença.

Sig+num Petri Andree, qui mandato domini regis pro domino fratre Andrea episcopo Valencie, cancellario suo, hec scripsit loco, die et anno prefixis.