Noverint universi quod nos Iacobus, Dei gracia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros damus licenciam et potestatem plenariam vobis, fratri Iohanni abbati de Petra et conventui eiusdem monasterii et successoribus vestris in perpetuum, quod possitis ponere et populare quoscumque homines et quascumque feminas volueritis, et hedificare ac construere ac facere hedificari et construi domos et villam in hereditate predicti monasterii que vocatur de Carenis, qui est in termino Calataiubi, sine impedimento et condicione cuiuslibet persone.

Et vos et successores vestri ac homines et femine, quos et quas ibi populabitis et successorum eorum, habeatis et teneatis hereditates omnes predicti loci francas et liberas in perpetuum, pro ut actenus vos et ipsi francas et liberas habuistis.

Concedimus etiam vobis et hominibus ac feminis qui in predicta hereditate populabunt et eorum successoribus, quod ipsi non teneantur unquam nobis vel nostris servire vel dare nisi secundum quod homines aliarum villarum et locorum predicti monasterii nobis solvere et dare tenentur, immo sint franchi et liberi cum bonis et rebus suis omnibus sicut ipsi alii homines vestri predicti.

Mandantes senioribus, baiulis, iudicibus, iusticiis, iuratis, alcaydis et universis aliis officialibus et subditis nostris, presentibus et futuris, quod contra hanc cartam nostram non veniant nec aliquem venire permitant aliqua ratione, immo eam observent et faciant firmiter ab omnibus observari.

Datum Ilerde, pridie idus aprilis anno Domini Mº. CCº. Lº. VIIº.

Signum + Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

(1ª col.) Testes sunt: P. de Montechateno. (2ª col.) Eximinus de Focibus. G. de Angularia. (3ª col.) Eximinus de Urrea. R. de Urgio.

Sig+num Michaelis de Alcoario, qui mandato domini regis pro domino fratre Andrea episcopo Valencie, cancellero suo, hec scribi fecit.