Per nos et nostros concedimus et indulgemus vobis, universis et singulis hominibus de Barbastro, presentibus et futuris, et vestris, imperpetuum, quod pro aliquibus hereditatibus seu possessionibus vel quibuslibet aliis bonis seu iuribus que vos vel aliquis vestrum emistis vel acquisivistis a quibuslibet personis, tam infancionibus quam hominibus nostri servicii, vel quocumque modo ad vos devenerunt usque in hunc presentem diem qua scribitur hec carta, extra terminos Barbastri, in villis, castris aut quibuslibet aliis locis nostris et eorum terminis, non peytetis nec teneamini peytare aut servire vos vel vestri nobis vel nostris in ipsis villis, castris vel locis, et serviatis inde nobis et nostris in Barbastro tantum et ubi nos dona vel servicia aut exacciones aliquas habeamus ab hominibus de Barbastro.

Similiter, de hereditatibus, possessionibus ac quibuslibet bonis seu iuribus que vos vel aliqui vestrum ab ista die predicta in antea, extra terminos Barbastri, in villis, castri aut quibuslibet aliis locis nostris vel eorum terminis emetis vel acquiretis vel qualibet alia racione ab infancionibus devenirent ad vos, non peytetis nec teneamini peytare aut servire pro illis in ipsis villis, castris aut locis nostris, sed serviatis pro ipsis in villa de Barbastro predicta, sicut dictum est, de aliis que iam emistis vel acquisivistis.

Si vero ab hominibus nostri servicii seu de realenco emeritis aliquid ab hac die predicta in antea, vel aliquo modo acquisieritis in villis, castris aut aliis locis nostris vel eorum terminis, peytetis et teneamini nobis et nostris peytare et servire pro ipsis in aliis locis, sicut alii homines ipsorum locorum pro hereditatibus et bonis sui nobis et nostris servient et peytabunt. Mandantes, etc.

Anno premisso, VII kalendas octobris anno Domini M. CC. L. VII.