Iacobus, [Dei gratia rex Aragonum, Maioricarum et Valencie, comes Barchinone et Urgelli et dominus Montispesulani].

Fidelibus suis iusticiis et conciliis de Exea, de Bayo et de Tauste. Salutem et graciam.

Intelleximus quod quilibet indiferenter emit panem in villis nostris et portat extra terram nostram in villam nostram contra mandatum factum a nobis, de quo multum miramur; unde vobis iterato, dicimus et mandamus firmiter et districte quatinus vos prohibeatis et deffendatis omnino quod aliquis mercator vel homo extraneus aut privatus non emat ibi panem quod extra terram nostram portet nec quod aliquis extrahat panem de terra nostra, quamvis habeat a nobis licenciam, exceptis Egidio de Rada et Egidio Balduvini de Tutela, quia nos omnes alias licentias quas super extrahendo pane de terra nostra concesseramus alicui, revocamus.

Unde quicumque contra hoc mandatum nostrum panem de terra nostra extraxerit et ad alienas terras portaverit vel consilium aut auxilium in eo dederit, sive sit miles aut alia persona quelibet, sciat se cum omnibus bonis suis in posse nostro incursum.

Et quicumque eciam aliquem vel aliquos invenerit extrahentes panem de terra nostra, capiat et retineat personas ad misericordiam nostram incursas et bestias cum pane habeat et accipiat ad suas voluntates inde libere perpetuo faciendas.

Volumus autem quod homines terre nostre possint emere panem et portare de una villa ad aliam villam terre nostre, ita tamen quod assecurent in posse vestro per sacramentum et per bonos fideiussores quod panem ipsum quem ement extra terram nostram, non portent nec vendant alicui homini qui ipsum extra terram nostram portare vellet et quod aportent vobis litteras testimoniales a iusticiis et iuratis illorum locorum, adque panem ipsum portabunt quod ipsum ibi posuerunt.

Quod nisi fecerint amittant in duplo quantum panis ipse valebat et illud ad opus nostri accipiatis; et ad hoc custodiendum et deffendendum, ponimus falconerium nostrum Egidium de Peralta alcaydum de Ul et de Filela.

Mandantes vobis firmiter, quatenus in hoc donetis ei consilium et iuvamen, si de nostri gracia confidatis vel amore.

Datum Barchinone, III idus novembris anno Domini Mº. CCº. Lº. VIIº.