Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montis Pesulani, per nos et nostros concedimus, indulgemus et etiam facimus graciam specialem vobis, universis sarracenis Aragonie, presentibus et futuris, quod de cetero non donetis nec teneamini dare primitiam aliquam nec aliquid racione primitie de aliquibus fructibus vestris.

Item concedimus vobis quod pro debitis que debeatis aliquibus personis, excepta peita nostra, nec pro querimonia quam aliquis habeat de vobis persone vestre non capitantur nec ad penam corporalem condemnentur nisi tamen pro criminale peticione sive fatica iuris in vobis prius inventa, vobis dantibus fidanciam quod facietis in posse nostro si fuerimus in Aragonia querelantibus de vobis iusticie complementum; et si in Aragonia non fuerimus quod secundum decimam sarracenorum directum faciatis.

Ittem volumus et statuimus quod de cetero aliquis sarracenus Aragonie non teneatur suspendere seu inforcare aliquem hominem qui in Cesaraugusta vel in alio loco ad suspendendum seu inforcandum iudicetur cum illud sit officium sagionis; sed sagionis Cesarauguste et aliorum locorum Aragonie illud facere compellatur.

Mandantes firmiter merinis, iusticiis, zalmedinis, alcaidis, iuratis et universis aliis oficialibus et subditis nostris, presentibus et futuris, quod predicta omnia et singula firma habeant et observent et faciant ab omnibus inviolabiliter observari, et non contraveniant nec aliquid contravenire permitant aliquo modo vel aliqua racione.

Datum Exee, sexto kalendas martii anno Domini millessimo ducentessimo sexagessimo tercio.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montis Pesulani.

Testes sunt: Ferrarius de Lizana. A. de Fontoba. Eximinus Petri de Ayerbe. Fortunius Ahe. Fortunius Petri de Isuerri.

Sig+num Michaelis Violete, qui mandato domini regis hec scribi fecit loco, die et anno prefixis.