Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, attendentes quod vos, venerabilis et dilecti in Christo Fratres Predicatores conventus oscensis et totum monasterium vestrum recipitis maximum dampnum et detrimentum et patimini magnum fetorem, propter furnos cantarenorum seu figulorum qui sunt iuxta monasterium vestrum.

Idcirco, per nos et nostros, ob remedium anime nostre, damus et concedimus vobis et successoribus vestris imperpetuum, quod dicti cantarerii seu figuli vel etiam quicumque alii simile officium exercentes et furni eorum removeantur a dicto loco et in alium mutentur.

Ita quod per spacium trescentarum canarum, que unaqueque habeat octo palmos, non fiant furni unquam aliquo tempore iuxta monasterium vestrum, nec dicti cantarerii seu figuli sive quicumque alii simile officium exercentes ibi non valeant operari.

Volentes et mandantes quod dicti cantarerii seu figuli qui nunc sunt mutaverint se in alium locum et recesserint a loco ubi modo sunt hinc ad extremam diem mensis augusti aliter quod a dicta die in antea solvant qualibet die nobis pro pena unum morabatinum de quolibet furno.

Mandantes çavalmedine Osce quod si ad dictam diem non mutaverint se in alium locum, quod ab ipsa die in antea extorqueat sine remedio dictum morabetinum a dictis cantareriis seu figulis de quolibet furno, qualibet die.

Volumus tamen et concedimus dictis cantareriis seu figulis quod possunt facere furnos suos et habitare ac operare in podio de Cimach, ubi consueverint facere antiquitus furnos suos.

Mandantes insuper çavalmedine, iuratis et universis aliis officialibus et subditis nostris, presentibus et futuris, quod hanc donacionem et concessionem nostram firmam habeant et observent et contra ipsam non veniant nec aliquem venire permitant aliqua racione.

Datum Osce, quarto nonas iulii anno Domini millesimo CCº. LXº. octavo.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: G. de Podio. P. Cornelii. Fortunius de Bergua de Podio. Lupus Guillelmi de Oteyza. P. de Ahuro.

Sig+num Simonis de Sancto Felicio, qui mandato domini regis predicti hec scribi fecit et clausit loco, die et anno prefixis.