Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros concedimus vobis, venerabili et dilecto nostro fratre Roderico Petri Poncii, comendatori domus Alcanicii ordinis Calatrave, et vestris successoribus, comendatoribus et fratribus eisdem domus, presentibus et futuris, in perpetuum, quod homines villarum et locorum comendarie predicte, tam christiani quam sarraceni, non teneatur dare nec donent in aliquibus locis terre vel iurisdictionis nostre aliquod pedagium sive lezdam pro aliquibus rebus suis quas ipsi portent vel vendant in terra nostra, nisi ipse res essent res mercatorie.

Mandantes firmiter baiulis, iusticiis, merinis, lezdariis et pedagiariis et aliis universis officialibus et subditis nostris, presentibus et futuris, quod predicta omnia firma habeant et observent ac faciant observari, ut superius continetur, et non contraveniant nec aliquem contravenire permitant aliqua racione.

Datum Valencie, XIIIIº kalendas februarii, anno Domini Mº. CCº. LXº. octavo.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: Guillelmus Raimundi de Muncada, Guillelmus de Podio, Blaschus Eximini de Arenos, Petrus de Ahuro, Lupus Sancii de Vergaz.