Noverint universi quod nos, Iacobus, Dei gracia rex Aragonum, Maioricarum et Valencie, comes Barchinone et Urgelli et dominus Montispesulani; recipimus et constituymus sub nostra proteccione, comenda et guidatico speciali capannas omnes ganati et bestiarii hominum Turoli et aldearum eiusdem, in eundo, stando et redeundo, per totam terram et dominacionem nostram.

Ita quod nullus de nostra gracia confidens sit ausus capannas ipsas, nec earum aliquam, nec partem earum, nec pastores aut custodes ipsarum, nec bona illorum, invadere, capere, detinere et gravare aut pignorare racione alicuius debiti vel aliene culpe, nisi dominus illius capanne quam pignorare vellet esset principalis debitor vel fideiusor pro aliis obligatus, nec etiam in hiis casibus nisi prius in eo iure esset inventa fatica.

Volumus etiam et statuimus quod pro aliqua tala quam faciant predicta ganata seu bestiaria, de die vel de nocte, in vineis, mesibus vel quibuslibet aliis rebus non donetur bannum, vel solvatur statutum vel statuendum, set quod tala ipsa emendetur in continenti domini illius rey, ad cognicionem bonorum virorum.

Mandantes igitur baiulis, iusticiis, iudicibus, iuratis et universis aliis officialibus et subditis nostris presentibus et futuris, quod hoc guidaticum nostrum firmum habeant et observent et contra ipsum non veniant nec aliquem venire permitant aliqua racione; immo predictas capannas et pastores ac custodes earum ubique manuteneant et defendant, ipsis tamen vel earum dominis facientibus querelantibus de eis iusticie complementum.

Quicumque autem contra hoc guidaticum nostrum venire attemptaverit, iram et indignacionem nostram et penam quingentorum morabatinorum se noverit incursurum, dampno illato ipsius primitus plenarie restituto.

Datum Cocentayne, XVIIº kalendas iulii anno Domini Mº CCº L octavo.

Signum + Iacobi, Dei gracia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: Gauceranomus de Pinos, Carrocius dominus Rebolleti, Raimundus de Montecatano, Bernardus Guillelmi de Entença, Artaldus de Focibus.

Sig+num Michaelis de Alcoario, qui mandato domini regis pro domino fratre Andrea episcopo Valencie cancellario suo, hoc scribi fecit, loco, die, anno prefixis.