Noverint universi, quod nos Iacobus, Dei gratia rex Aragonum, Maioricarum et Valencie, comes Barchinone et Urgelli, et dominus Montispesulani, per nos et omnes successores nostros, confitentes et recognoscentes nos in civitate Valencie foros et consuetudines Valencie, iam iurasse ipsas per omnia et in omnibus observare, et ex ipsis aliquid non diminuere vel eis addere vel ipsas in aliquo inmutare, verum cum natura cotidie novas deproperet edere formas et novis moribus nova conveniat antidota preparari, et non sit reprehensibilis iudicatum et secundum varietates temporum statuta variantur humana, ad instanciam et requisitionem magnatum et militum et religiosorum ac proborum hominum civitatis Valencie et totius regni, cum instanciam requirentes quod foros aliquos deberemus corrigere, emendare ac etiam declarare, et etiam propter ea que noviter contigant eis aliqua addere deberemus, nos atendentes quod in eorum tranquillitate, pace et requie noster animus requiescit, propter utilitatem comunem civitatis et tocius regni Valencie predicti, predictos foros correctioni dedimus, addentes, detrahentes, corrigentes et emendantes quod in ipsis addenda fuerit detrahenda, corrigenda ac etiam emendanda.

Et ut omnia que in ipsis addidimus, detraximus, correximus et emendavimus, cum omnibus aliis foris qui in aliquo tacti et non sunt vel etiam inmutati, per nos et nostros successores sive diminucione, additione, correctione aliqua perpetuo observentur, iuramus ut ea predicta et infrascripta omnia confirmando, per Deum et super sancta Dei IIIIor. evangelia, a nobis corporaliter tacta, predictos foros, cum omnibus addicionibus et correctionibus, diminutionibus et emendis in eis factis, pro ut vobis tradidimus, tenere et perpetuo observare, et in ipsis aliquo ipsi tempore aliquid non addere, detrahere, corrigere vel mutare, nisi de evidenti et maxima necessitate fieri opporteret, et quod tunc fieret cum assensu et voluntate vestra; immo per nos et omnes successores nostros ipsi tenebimus et teneri et observari faciemus et inviolabiliter custodiri.

Volumus preterea et concedimus vobis, universis et singulis habitatoribus civitatis et tocius regni Valencie, presentibus et futuris imperpetuum, quod nos pro ut iuravimus et confirmavimus predictos foros et consuetudines, semper de cetero successores nostri teneantur iurari et confirmare ipsos foros et consuetudines, ad tenere et perpetuo observare, et nunquam in aliquo contravenire, sic quod quando dicti successores nostri debebunt regnare apud Valenciam, veniant et infra unum mensem ex quo fuerint ibi in civitate Valencie, et tunc iurent et confirment dictos foros et consuetudines coram omnibus, pro ut superius est iam dictum.

Et semper successores nostri, unus post alium, succesive, dicta iuram et confirmacionem facere teneatur, sub forma superius prenotata.

Et ad hec nos et successores nostros, ex certa sciencia, perpetuo obligamus.

Mandantes universis habitatoribus civitatis et tocius regni Valencie, presentibus et futuris, quod dictis foris cum emendationibus, correctionibus, declarationibus et addicionibus et aliis supradictis utantur, et in omnibus causis uti de cetero teneantur, et aliis consuetudinibus sive foris aliquo tempore non utantur.

Datum Valencie XIIº kalendas aprilis anno Domini Mº. CCº. LXXº.

Signum Iacobi Dei gratia regis Aragonum, Maioricarum et Valencie, comitis Barchinone et Urgelli, et domini Montispesulani.

Testes sunt, P. de Villamin. Guillelmus Arnaldi de Angularia, Garcias Ortis de Açagra, Gaucerandus de Pinos, Atonus de Montechateno.

Signum Symonis de Sancto Felicio, qui mandato domini Regis predicti, hec scribi fecit et clausit loco die et anno prefixis.