Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros concedimus vobis probis hominibus et universitati Valencie, presentibus et futuris, imperpetuum, quod in capite hereditatis Raymundi Guillemi, quam habet iuxta Villam Novam maris Valencie, que hereditas contiguatur hereditatis Guillelmi de Soler, hedifficetis pontem ligneum sive lapideum, qui pons sit publicus et comunis ad transeundum ad Villam Novam maris Gradus Valencie, et de ista hereditate Raimundu Guillelmi predicti, ad usum vie publice, a principio hereditatis predicti Raymundi, quod principium contiguatur hereditati Guillelmi de Soler, accipiatis ultra viam, que ibi est modo, III braciatas terre in latitudine a principio dicte hereditatis usque ad portam ipsius Ville Nove, quem pontem et ipsam quam feceritis, habeatis in perpetuum ad publicum usum, promitentes quod aliquo iure vel causam predictam concessionem et donacionem non revocabimus nec revocari faciemus, imo faciemus vos et totam universitatem Valencie imperpetuum tenere et possidere supradicta contra omnes personas.

Datum Morelle XVº kalendas febroarii anno Domini Mº CCº quinquagesimo.

Signum Iacobi Dei gratia regis Aragonum, Maioricarum et Valencie, comitis Barchinone et Urgelli, et domini Monstispesulani.

Testes sunt, Petrus Cornelli, Raimundus de Timor, Guillelmus de Montecatheno, Guillelmus de Angularia, Ferrarius Garçes de Roda.

Signum Petri Andree, qui mandato Regis pro Guillelmo scriba notario suo, hec scripsit loco die et anno prefixis.