Nos Jacobus Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; concedimus vobis fidelibus nostris çavalmedine, juratis, et toti concilio Cesarauguste, ac etiam vobis mandamus quod faciatis et facere possitis juntam cum omnibus illis civitatibus et villis quas volueritis que circumadiacent civitati Cesarauguste, ut possitis vobis defendere de illis qui vos offenderint vel offendere voluerint, premissa primitus monitione ante quam dampnum aliquod alicui faciatis.

Et si forte ad prosequendum apellitum vos exire oportuerit post aliquem malefactorem, et ipse malefactor vobis fideiussorem sufficientem dederit de directo, volumus quod ipsum fideiussorem ab eo recipiatis nisi cum malefitio fuerit deprensus.

Et si presumpto sit quod prefatus malefactor quem prosecuti fueritis villam vel castrum aut in alium locum introierit, et dominus illius loci dederit ad prescrutandum et perquirendum illum locum quo suspitionem habueritis vel malefactorem vobis tradiderit, domino illius loci ubi dictus malefactor inventus fuerit, si dominus ille fideiussorem vobis dederit de directo de querimoniis quas de ipso habueritis in persona vobis rebus dampnum vel malum aliquod nullatenus faciatis. Proviso tamen solliciter et attente, ne alicui vel aliquibus iniuriam vel forciam faciatis.

Datum Barchinone, octavo kalendas iulii anno Domini Mº CCº sexagesimo.