Nos Jacobus, Dei gratia rex Aragonum et regni Maioricarum, comes Barchinone et Urgelli et dominus Montispesulani, promitimus vobis Çayen regi, neto regis Lupi et filio de Modef, quod vos et omnes mauri tam viri quam mulieres qui exire voluerint de Valencia, vadant et exeant salvi et securi cum suis armis et cum tota sua ropa mobili quam ducere voluerint et portare secum, in nostra fide et in nostro guidatico, et ab hac die presenti quod sint extra civitatem usque ad viginti dies elapsos continue.

Preterea volumus et concedimus quod omnes illi mauri qui remanere voluerint in termino Valencie, remaneant in nostra fide salvi et securi, et quod componant cum dominis qui hereditates tenuerint.

Item, assecuramus et damus vobis firmas treugas per nos et omnes nostros vassallos, quod hinc ad VII annos dapnum malum vel guerram non faciemus per terram nec per mare, nec fieri permittamus in Deniam, nec in Cuileram, nec in suis terminis. Et si faceret forte aliquis de vassallis et hominibus nostris, faciemus illud emendari integre, secundum quantitatem eiusdem maleficii.

Et pro hiis omnibus firmiter atendendis, complendis et observandis, nos in propria persona iuramus et facimus iurare dominum Ferrandum, infantem Aragonum, patruum nostrum, et domnum Nunonem Sancii, consanguineum nostrum, et domnum P. Cornelii, maiorem domus Aragonum, et domnum P. Ferrandi de Açagra, et domnum Garciam Romei, et domnum Rodericum de Liçana, et domnum Artallum de Luna, et domnum Berengarium de Entença, et G. d'Entença, et domnum Atorella, et domnum Assallitum de Gudal, et domnum Furtunii Açnariç, et domnum Blascum Maça, et Rogerium comitem pallariensem, et Guillermum de Montecatano, et R. Berengarium de Ager, et G. de Cervilione, et Berengarium de Eril, et R. G. de Odena, et Petrum de Queralt, et Guillermum de Sancto Vincencio.

Item nos P. Dei gracia narbonensis, et P. terrachonensis, archiepiscopi; et nos Berengarius barchinonensis, P. cesaraugustanus, V. oscensis, G. tirasonensis, Eximinus segobricensis, P. dertusensis et B. vicensis, episcopi, promitimus quod hec omnia supradicta faciemus atendi et atendemus, quantum in nobis fuerit et poterimus bona fide.

Et ego Çayen, rex predictus, promito vobis Jacobo, Dei gracia regi Aragonum, quod tradam et reddam vobis omnia castra et villas que sunt et teneo citra Xuchar, infra predictos scilicet XX dies, abstractis et retentis mihi illis duobus castris, Denia scilicet et Cuilera.

Datum in Roçafa, in obsidione Valencie, IIII kalendas octobris Era Mª. CCª. LXX. sexta.

Sig+num Guillermi Scribe, qui mandato domini regis pro domino Berengario, barchinonensi episcopo cancellario suo, hanc cartam scripsit loco die et Era prefixis, cum literis suprapositis in quinta linea.